Ang Pneumonia Indi Lahug-Lahog

Ngaa bala gaka pneumonia ang tawo? Ano ang ginahalinan sini?

Sa eksperyensya ko bilang isa ka nars, ang pneumonia pwede makuha sang isa ka tawo nga may mahina nga immune system. Kung ini mahina, ikaw madali malatnan sang mga kagaw ukon bacteria nga maga-resulta sa ini nga sakit. Gani, ang mga tigulang kag mga bata ang pirmi ginahalitan sini. Sila maga-ubo kay maga damu ang plema sa ila nga baga nga budlaw mapagwa. Kung indi nila mauskag ang ila nga plema, ini maga-bara sa mga tubo sang ila lungs. Ang resulta - magabudlayan sila mag-ginhawa.

Makwa mu ang sakit nga ini sa inyo komyunidad, sa ospital, ukon sa diin man nga lugar nga nagatuhaw ang kagaw nga gadulot sang pneumonia. Amu na siguraduhon gid nga indi basa balhas ang likod kung magtulog, matinlo ang palibot, magpalayo sa mga tawo nga naga-ubo, kag magkaon sang mga prutas kag utan.

Ang isa pa ka ginahalinan sang ini nga sakit ang pag-dunlan. Kung ikaw sungak-sungak ukon gadali magkaon, pwede magtalang ang pagkaon ukon tubig sa imo baga. Ina ginatawag nila nga aspiration pneumonia. Gets? Amu na kung magkaon, hinay-hinay lang. Ini labi na gid sa mga tigulang ka yang ila pagdulungdan mahina na gani dapat man sila alalayan kung magkaon.

Ini nga sakit indi lahug-lahog. Kung ang imu nga baga, magkipot, paano ka pa kaginhawa? Amu na kung gaubo-ubo ikaw, nabudlayan mag ginhawa, kag gahilanat, magpakonsulta gilayon sa duktor. Ang pneumonia malikawan kung ikaw maka-inom sang mga insakto nga bulong. Ini malikawan kung ikaw baskug kag ga ehersisyo.

Tandaan: Mahal magpa hospital. Biskan machine sang paaso may sukot. Wala da labot ang bulong. Kag indi lang ini isyu sang galastuhan. Isyu ini sang imu kabuhi nga dapat mo amumahon kag bantayan.